ՄԻՋՈՑԱՌՈՒՄՆԵՐ

ՄԻՋՈՑԱՌՈՒՄ-ՔՆՆԱՐԿՈՒՄ ԼՈՌՈՒ ՄԱՐԶԱՅԻՆ ԳՐԱԴԱՐԱՆՈՒՄ

#Ազգային_գրադարանային_շաբաթի_ծրագրում

Ապրիլի 15-ին «Ազգային գրադարանային շաբաթ» ծրագրի շրջանակներում Լոռու մարզային գրադարանում տեղի ունեցավ Վահագն Գրիգորյանի «Ժամանակի գետը» վեպին նվիրված միջոցառում-քննարկում: Միջոցառմանը ներկա էին գրադարանի աշխատակիցներ, ուսանողներ, հայ ժամանակակից գրականությամբ հետաքրքրվող անձինք: Բանախոսը գրադարանի աշխատակից Կարեն Մանուչարյանն էր: Վերջինս հատուկ ընդգծեց վեպի արդիականությունը, խոսեց կերպարային համակարգի եւ բովանդակության մասին: Սա, ըստ բանախոսի եւ քննարկման մասնակիցների, մի վեպ է, որ ամենայն խորությամբ բացահայտում է թուրքի էությունը: Ներկաները վեպում ընդգրկված իրադարձությունները մեկնաբանեցին մեր օրերի դիրքերից՝ աչքի առաջ ունենալով վերջին շրջանում հայ ժողովրդի կյանքում տեղի ունեցած ողբերգական իրադարձությունները: Ծավալվեց բովանդակալից քննարկում:

ՀԱՄՈ ՍԱՀՅԱՆ-107

#Ազգային_գրադարանային_շաբաթի_ծրագրում

«Ամեն ժողովուրդ իր մեջ ունի անսահման գույներ ու երանգներ,- ասել է Սահյանը։ - Սակայն ժողովուրդն այդ գույները չի կարող բացահայտել ինքնուրույն, ամեն մի բանաստեղծ իր ստեղծագործություններով բացահայտում է ժողովրդի մի գույնը։ Մեծ բանաստեղծները՝ Չարենցի պես, կարող են տասը գույն ու երանգ բացահայտել»։
Համո Սահյանի բերած գույներն ու երանգները ինքնատիպ էին և հոգեհարազատ։ Ապրիլի 14-ը մի օր է՝ կարոտով հիշելու հայ քնարերգության երախտավորին՝ վերցնելու նրա ժողովածուներից մեկը եւ վայելելու նրա բանաստեղծական արվեստի պատճառած բերկրանքը: Անվանի բանաստեղծի ծննդյան օրվան էր նվիրված Լոռու մարզային գրադարանի Մանկական բաժնում կազմակերպված պոեզիայի ժամը։ Միջոցառման մասնակիցներն էին մեր հավատարիմ ընթերցողները` ՎՊՀ Ռուսերեն լեզվի եւ գրականության բաժնի 2-րդ կուրսի ուսանողուհիները։

ՍԵՄԻՆԱՐ-ՔՆՆԱՐԿՈՒՄ ԼՈՌՈՒ ՄԱՐԶԱՅԻՆ ԳՐԱԴԱՐԱՆՈՒՄ

#Ազգային_գրադարանային_շաբաթի_ծրագրում

<<Ազգային գրադարանային շաբաթ>> ծրագրի շրջանակներում այսօր Լոռու մարզային գրադարանում տեղի ունեցավ սեմինար-քննարկում` նվիրված ԱՊՀ երկրների կազմավորման 30-ամյակին։ Սեմինարը վարում էր ՎՊՀ Էկոնոմիկայի, իրավունքի և կառավարման ամբիոնի դասախոս Դավիթ Հակոբյանը։ Վերջինս խոսեց ԱՊՀ կազմավորման և գործունեության մասին։ Ներկաներն ուղղեցին իրենց հետաքրքրող հարցերը, ստացան սպառիչ պատասխաններ։ Շնորհակալ ենք պարոն Հակոբյանին հետաքրքիր ու բովանդակալից սեմինարի համար։

ՄԱՆԿԱԿԱՆ ԳՐՔԻ ՀՐԱՇԱԼԻ ԱՇԽԱՐՀԸ

#Ազգային_գրադարանային_շաբաթի_ծրագրում

Ապրիլի 12-ին Լոռու մարզային գրադարանի Մանկական բաժինը <<Անհաղթ աքլոր>> մանկական մշակութային զարգացման կենտրոնի հետ համատեղ <<Ազգային գրադարանային շաբաթ>> ծրագրի շրջանակներում սաների համար կազմակերպեց <<Գիրքը մեր կյանքում >> խորագրով ուսուցողական միջոցառում։ Գրքին եւ նրա նշանակությանը նվիրված ներածական զրույցի ավարտին փոքրիկները ունկնդրեցին Հ.Ք. Անդերսենի <<Թագավորի նոր զգեստը>> եւ Կ. Չուկովսկու <<Մոյդոդիր>> հեքիաթները։

ԳԻՐՔԸ՝ ԲԱԼԱՍԱՆ: ԱԶԳԱՅԻՆ ԳՐԱԴԱՐԱՆԱՅԻՆ ՇԱԲԱԹ

Այսօր՝ ապրիլի 12-ին, մեկնարկեց Ազգային գրադարանային շաբաթը, որը Հայաստանում նշվում է արդեն 20 տարի: Այս տարվա Ազգային գրադարանային շաբաթը, որ հոբելյանական է, մեր օրերին համահունչ կարգախոս ունի՝ «Գիրքը՝ բալասան»: Գրադարանային գործի բազմաթիվ մասնագետներ հավատացած են, որ գիրքը ամոքիչ է եղել հնուց, բոլոր դժվար ժամանակներում մարդը ապավինել է նաեւ գրքին, հավատացել նրա բովանդակության ուժին, որոշ գրքեր նույնիսկ բարձի տակ են դրվել… Գրադարանները, որտեղ պահվում են գրքերը, նույնպես մեծ դեր են ունեցել, շարժիչ ուժ են եղել հասարակությունների զարգացման, կրթման գործում: