Մարտի 3-ը Գրողների միջազգային օրն է։ Այս տարի, ցավոք, մարտի 3-ին Լոռու մարզը, Վանաձոր քաղաքը, հանրապետության մտավորականությունն իր վերջին հրաժեշտը տվեց տաղանդավոր բանասեր, բանաստեղծ, լրագրող-հրապարակախոս, ՎՊՀ նախկին գլխավոր խմբագիր, լավ ընկեր, լավ մարդ, գրադարանի բարեկամ Լևոն Սարգսյանին։
Լոռու մարզային գրադարանի աշխատակիցները, ի հիշատակ Լևոն Սարգսյանի, ընթերցեցին նրա գեղեցիկ ստեղծագործություններից։

Լոռու մարզային գրադարանի մի խումբ աշխատակիցներ տնօրեն Կ. Հակոբյանի հետ միասին մասնակցեցին Վանաձորի Կերպարվեստի թանգարանում կազմակերպված միջոցառմանը, որը նվիրված էր թանգարանի նախկին տնօրեն, գրադարանի լավ բարեկամ, գեղանկարիչ, քանդակագործ, բանաստեղծ Փափագ Ալոյանի ծննդյան 70-ամյակին։

Փետրվարի 24-ին թումանյանական ամսվա միջոցառումների շրջանակներում ԼՄԳ Մանկական բաժինը հյուրընկալեց Վանաձորի թիվ 6 հիմնական դպրոցի 3-րդ "Ա" դասարանի աշակերտներին (դասվար` Նազելի Սաղաթելյան)։ Բանաստեղծի կյանքին եւ ստեղծագործությանը նվիրված ուսուցողական միջոցառման ավարտին երեխաները միասին կատարեցին Թումանյանի <<Ախ, ինչ լավ են սարի վրա...>> բանաստեղծության խոսքերով երգը։

Փետրվարի 22-ին Լոռու մարզային գրադարանի Մանկական բաժնում իրենց արտադասարանային ժամն անցկացրեցին թիվ 25 հիմնական դպրոցի 2-րդ "Բ" դասարանի աշակերտները (դասվար` Անահիտ Թերեքյան)։ Գրադարանին, նրա կառուցվածքին ծանոթանալուց հետո երեխաները հանդես եկան գրքին եւ մայրենի լեզվին նվիրված կատարումներով։