ՄԻՋՈՑԱՌՈՒՄՆԵՐ

Հանդիպում հայ ժամանակակից բանաստեղծ, հրապարակախոս Խաչիկ Մանուկյանի հետ:

#Ազգային_գրադարանային_շաբաթի_ծրագրում

Այսօր Լոռու մարզային գրադարանում տեղի ունեցավ հանդիպում հայ ժամանակակից բանաստեղծ, հրապարակախոս Խաչիկ Մանուկյանի հետ: Ներկա էին գրադարանի աշխատակիցներ, ուսանողներ, ՀԳՄ Լոռու բաժանմունքի նախագահ Մանվել Միկոյանը, գրականագետ, «Արմավ» հրատարակչության գլխավոր խմբագիր Արմեն Ավանեսյանը, բանաստեղծ-թարգմանիչ Խորեն Գասպարյանը, լեզվաբան Դավիթ Գյուլզադյանը, գրականագետներ Արտակ Սարուխանյանը, Վալերի Փիլոյանը, Գայանե Մալումյանը, արձակագիր Նարինե Կռոյանը, բանաստեղծներ Ռաֆ Բարաթյանը, Ռուզան Հովասափյանը եւ այլք: Միջոցառումը վարում էր գրադարանի աշխատակից Կարեն Մանուչարյանը: Բացման խոսքում Խաչիկ Մանուկյանը շնորհակալություն հայտնեց Լոռու մարզային գրադարանի աշխատակազմին գրական-մշակութային կյանքի զարգացմանը նպաստող հանդիպում-քննարկումներ կազմակերպելու համար: Կարեւորեց այն հանգամանքը, որ Լոռին գրական հզոր ավանդույթներ ունեցող տարածաշրջան է: Գրականագետ Արմեն Ավանեսյանը ներկայացրեց Խաչիկ Մանուկյանի ստեղծագործական դիմանկարը, նրա բանաստեղծությունների թեմատիկ, տաղաչափական եւ պատկերային առանձնահատկությունները: Բանաստեղծ Մանվել Միկոյանը խոսեց Խաչիկ Մանուկյանի ստեղծագործության գեղարվեստական արժանիքների մասին:

«Ճակատագիր» մենաներկայացում

#Ազգային_գրադարանային_շաբաթի_ծրագրում

<<Ազգային գրադարանային շաբաթ>> ծրագրի շրջանակներում այսօր` ապրիլի 16-ին, Լոռու մարզային գրադարանում տեղի ունեցավ Ռոբերտ Առաքելյանի` անզուսպ ծիծաղ պարգևող, բայց անչափ խորիմաստ <<Ճակատագիր>> stand up մենաներկայացումը։ Ներկայացման ընթացքում հանդիսատեսն ականատես եղավ իրական կյանքից վերցված սուր հումորային իրավիճակների։ Ներկաները գրադարանի սիրելի բարեկամին բեմից ճանապարհեցին բուռն ծափերով` նրան կրկին հյուրընկալելու մեծագույն պատրաստակամությամբ։

ՄԻՋՈՑԱՌՈՒՄ-ՔՆՆԱՐԿՈՒՄ ԼՈՌՈՒ ՄԱՐԶԱՅԻՆ ԳՐԱԴԱՐԱՆՈՒՄ

#Ազգային_գրադարանային_շաբաթի_ծրագրում

Ապրիլի 15-ին «Ազգային գրադարանային շաբաթ» ծրագրի շրջանակներում Լոռու մարզային գրադարանում տեղի ունեցավ Վահագն Գրիգորյանի «Ժամանակի գետը» վեպին նվիրված միջոցառում-քննարկում: Միջոցառմանը ներկա էին գրադարանի աշխատակիցներ, ուսանողներ, հայ ժամանակակից գրականությամբ հետաքրքրվող անձինք: Բանախոսը գրադարանի աշխատակից Կարեն Մանուչարյանն էր: Վերջինս հատուկ ընդգծեց վեպի արդիականությունը, խոսեց կերպարային համակարգի եւ բովանդակության մասին: Սա, ըստ բանախոսի եւ քննարկման մասնակիցների, մի վեպ է, որ ամենայն խորությամբ բացահայտում է թուրքի էությունը: Ներկաները վեպում ընդգրկված իրադարձությունները մեկնաբանեցին մեր օրերի դիրքերից՝ աչքի առաջ ունենալով վերջին շրջանում հայ ժողովրդի կյանքում տեղի ունեցած ողբերգական իրադարձությունները: Ծավալվեց բովանդակալից քննարկում:

ՀԱՄՈ ՍԱՀՅԱՆ-107

#Ազգային_գրադարանային_շաբաթի_ծրագրում

«Ամեն ժողովուրդ իր մեջ ունի անսահման գույներ ու երանգներ,- ասել է Սահյանը։ - Սակայն ժողովուրդն այդ գույները չի կարող բացահայտել ինքնուրույն, ամեն մի բանաստեղծ իր ստեղծագործություններով բացահայտում է ժողովրդի մի գույնը։ Մեծ բանաստեղծները՝ Չարենցի պես, կարող են տասը գույն ու երանգ բացահայտել»։
Համո Սահյանի բերած գույներն ու երանգները ինքնատիպ էին և հոգեհարազատ։ Ապրիլի 14-ը մի օր է՝ կարոտով հիշելու հայ քնարերգության երախտավորին՝ վերցնելու նրա ժողովածուներից մեկը եւ վայելելու նրա բանաստեղծական արվեստի պատճառած բերկրանքը: Անվանի բանաստեղծի ծննդյան օրվան էր նվիրված Լոռու մարզային գրադարանի Մանկական բաժնում կազմակերպված պոեզիայի ժամը։ Միջոցառման մասնակիցներն էին մեր հավատարիմ ընթերցողները` ՎՊՀ Ռուսերեն լեզվի եւ գրականության բաժնի 2-րդ կուրսի ուսանողուհիները։